menu Menú
140.000 PERSOAS SEGUEN TIRADAS NAS CUNETAS
Por Francisco Castro Publicado en A Canción do Náufrago (Blog) en enero 3, 2018 0 Comentarios 2 min lectura
Aquel día en que fun monárquico Anterior POLA MIÑA CULPA, POLA MIÑA CULPA, POLA MIÑA GRAN CULPA Siguiente

Neste ano que rematou cumpríronse 10 anos da Lei de Memoria Histórica. E malia iso, que é moito tempo, 140.000 persoas seguen esquecidas nas cunetas. Xa sabedes, logo de Camboia, España é o lugar do mundo que máis xente soterrada ten sen identificar. Unha triste marca que, seica, a ninguén preocupa. Cando menos, a ninguén dos que gobernan e que ignoran as peticións de todas esas españolas e españois que si que lles interesa, que si que esperan que o seu goberno lles axude a dar cos restos de seus pais e nais, avós e avoas, irmáns e irmás. Eses 140.000 que están nas cunetas tamén son españois. Tamén deberían ser buscados polo goberno de España. A non ser, claro, que o goberno de España considere -como semella- que eses non son un problema seu, que se la pela, vamos.

O grave, mirade o que digo, non é que haxa tanta xente aí esquecida. O grave é, precisamente, que está esquecida. O goberno do PP (partido fundado por un exministro de Franco) e os seus dirixentes, cando se lles saca o tema, axiña falan de “non abrir as feridas” ou, como dixo Pablo Casado moitas veces (e non é do peor que dixo; Hernando o superou en varias ocasións), ese é un asunto “que no interesa a nadie”. Por iso, dende que gobernan, non adicaron un céntimo de euro ao desenvolvemento da Lei de Memoria Histórica (malia que é unha lei, e eles sempre din que hai que cumprir a lei). No primeiro ano de Rajoy, reduciuse o orzamento á metade e pechou a Oficina de Vítimas. No segundo, nin un euro. E así dende hai seis anos.

E, mirade de novo o que digo, iso tampouco é grave.

O grave é que presumen de non gastar na Memoria Histórica.

O propio Rajoy dixo unha vez, presumindo, cando lle preguntaron sobre esta cuestión: “si, se que la ley existe, pero no le dedicamos ni un euro”. Dixo iso sorrindo, feliz de ser tan bo xestor.

O PP aínda non condenou o franquismo. E non move un dedo para ilegalizar fundacións coma a Francisco Franco ou pechar, de vez, o Valle de los Caídos.

Mentres, 140.000 almas berran na noite máis escura para que alguén lles devolva a dignidade.


Anterior Siguiente

keyboard_arrow_up

Usamos cookies para mellorar a experiencia de navegación. Se continúas navegando entendemos que aceptas a política de privacidade e cookies. Máis información

Esta páxina web utiliza cookies propias e de terceiros para mellorar a experiencia de navegación, e funcionalidades (como deixar comentarios ou enviar unha mensaxe no formulario de contacto) que recompilan datos de usuario.

Podes revisar que datos se recompilan e como son procesados na política de privacidade e cookies.

Pechar