Seguindo co de onte, hai outra cousa que non entendo.

Os xornais galegos, todos todiños sen excepción, hoxe dedican páxinas completas (seica non hai nada interesante que contar, será por iso que xa case que ninguén le a prensa e imos todos de cabeza aos blogs e facebooks e twitters, etc…) a Xosé Tomás, e á desgraza de corrida (hai corridas que non dan gusto, seica) que foi a primeira tourada de Pontevedra (por certo, canto politico por alí, dando exemplo, aínda que non sei de que).

Repito: páxinas completas nos xornais galegos.

Un vello axioma xornalístico di que os medios de comunicación deben dedicar o seu espazo ao que lle interesa a xente.

Pois algo está mal, porque os estudos máis serios sinalan que as corridas (as de touros) só lle interesan ao 3 por cento dos galegos. Daquela, a atención mediática que se lles dispensa non é de todo lóxica se 97 de cada cen galegos non lles importan as corridas de José Tomás nin de Espartaco.

E xa que estamos: aos galegos e galegas impórtalles moito máis do 3 por cento a literatura e a cultura galega, sen embargo, o espazo que se lles dedica, en xeral, nos medios á esta realidade obxectivamente máis interesante para nós, non se corresponde coa porcentaxe obtida.

Daquela, sigo pedindo luz para que alguén mo explique.