No marco dos Actos Castelao 2026 impulsados polo Concello de Rianxo, que achegarán múltiples actividades culturais neste arrinque do ano, o Auditorio de Rianxo vai acoller o vindeiro venres 16 de xaneiro un concerto recital de homenaxe a cargo do músico e escritor Francisco Castro. Será a partir das 21.00 horas, con entrada de balde até completar a capacidade do Auditorio (a retirada de convites cómpre facela na billeteira dende unha hora antes do comezo do concerto).

Segundo informa nas redes o propio Francisco Castro, será o seu primeiro concerto do ano e “servirá de homenaxe, na súa terra, ao gran Alfonso Daniel Rodríguez Castelao”. O músico e escritor galego subirá ao escenario na compaña do percusionista Valerio Araujo e “xuntos faremos unha viaxe sonora pola miña música e por grandes temas da música galega, sempre con Castelao no corazón; será un concerto único e moi especial para reivindicar ao vello rianxeiro”.