Semella que nos últimos tempos, neste meu blog non falo máis que de cartos. Pero é que ten que ver, e moito, co asunto cultural.

E se hai uns días suxeriamos que aproveitando iso da crise as administracións públicas ían pechar moitas billas, hoxe, lendo de vagar os Orzamentos Xerais do Estado previstos para este 2010, vemos que no apartado dedicado a Cultura hai un descenso de -6.1 por cento. Que dito así pode semellar unha mingurria pero é algo así como 60 millóns de euros menos que o ano pasado.

Eu son dos que pensa que o nivel de evolución dun país pode medirse polos recursos que se destinan a cultura. E non só iso, senón tamén pola resultante da comparativa con outras partidas.

E agora, que cada quen saque as súas conclusións.

Para cultura quedan 807.52 millóns de euros. Que son moitos euros, dende logo. Menos que o ano pasado pero unha chea. Vale. Pero agora, comparemos. Para Presidencia (que non sei eu que nivel de importancia pode ter para a cidadanía), serán 926.72, é dicir, máis que para cultura. E, como guinda, Defensa, é dicir, o exército e o armamento. Para iso hai 2.691.99 millóns de euros.