Hoxe a prensa recolle que o escritor supervendas Stephen King vai aparecer na serie Sons of Anarchy, da que nada sei e sobre a que nada sabería de non ser por esa noticia que a vencella cun literato e que chamou a miña atención. Foi convidado a facer un cameo despois de declarar que era un fan seguidor desa serie. Os produtores non o dubidaron.

Sen dúbida, é unha grande idea esa de convidar a un escritor a participar facendo unha esceniña por iso da admiración.

Así que aproveito para dicir aquí, como me consta que este meu blogue é tan seguido pola banda dos produtores de Hollywood, que sinto unha enorme admiración por Scarlett Johannson e daquela, igual se lles pasou pola cabeza a posibilidade de pedirlle a algún escritor de lingua minorizada un cameo con ela.

Máis que nada para que lles conste.