Leo en El País de hoxe que volve Michael Moore cunha nova película. É unha boa nova para encetar este 2010 que vai estar cheo de loita en moitas frontes, xa veredes. O seu cine é necesario e aínda onte á noite tremamos, a familia unida, vendo o seu Fahrenheit 9/11. Cando eu era profesor, púxenlla a todos os alumnos e alumnas que caeron nas miñas mans. Esa e tamén Bowling for Columbine.

Michael Moore é un autor esencial, tanto como cineasta como brillante tamén como escritor (divertidísimo e lúcido o seu Estúpidos hombres blancos), e debemos sentirnos felices de que aínda queden directores coma el, dispostos a axitar as nosas conciencias e obrigándonos a facernos preguntas importantes.