Xa me tardaba recomendar esta entrevista con Xosé Reboiras, secretario xeral da Federación de Relixiosos do Ensino, onde demostra que aínda queda xente, dentro da Igrexa católica, con cabeciña. Cando menos no que ao asunto lingüístico se refire.
A Federación é célebre por promover o uso do galego, e pola organización dun premio que é todo un referente dentro da Literatura Infantil e Xuvenil como é o Frei Martín Sarmiento. O día que fan a Festa da Lingua moven a milleiros de rapazas e rapaces nunha xornada lúdica arredor da nosa fala.
Na entrevista, este sacerdote é contundente: o galego é a lingua que está en perigo, non o castelán. Clarísimo. E máis adiante: os rapaces viven nun medio no que predomina a lingua castelá, os medios de comunicación están no mesmo idioma e tamén as novas tecnoloxías.
Reconforta saber que na Igrexa católica, historicamente unha institución galegófoba e pouco dada ao sentido común, conta entre os seus membros con cabezas lúcidas coma esta.
Planteamentos así son moi bos para todos.